ශානි අබේසේකරට යුක්තිය ඉටුවේ -වාස් ගුණවර්ධන නඩුවෙන් ශානි නිදහස් වේ

 

කොළඹ අපරාධ කොට්ඨාශය විසින් 2020 මහ මමැතිවරණයට දින කිහිපයක් අත් අඩංගුවට ගෙන මාස 10 කට අධික කාලයක් රිමාන්ඩ් බාරයේ සිට ඇප පිට සිටින අපරාධ පරීක්ෂණ දෙපාර්තමේන්තුවේ හිටපු අධ්‍යක්ෂ ඡ්‍යෙෂ්ඨ පොලිස් අධිකාරී ශානී අබේසේකර ඇතුළු එම නඩුවේ සියලු සැකකරුවන් නිදහස් කිරීමට ගමිපහ ප්‍රධාන මහේස්ත්‍රාත් සිලනි චතුරන්ති පෙරේරා අද (25) නියෝග කළාය.




ත්‍රිපුද්ගල මහාධිකරණයක් විසින් මරණ දඬුවම නියමව සිටින හිටපු නියෝජ්‍ය පොලිස්පති ගනේන්ද්‍ර වාස් ගුණවර්ධන ගේ සිද්ධියට අදාල නඩුවේ ගිණි අවි සහ පුපුරණ ද්‍රව්‍ය ආදේශ කර ව්‍යාජ නඩුවක් නිර්මාණය කරන ලදැයි චෝදනා කරමින් කොළඹ අපරාධ කොට්ඨාශයේ නිළධාරීන් පිරිසක් විසින් 2020 වසරේ ජුලි 31 දා උදෑසන ඡ්‍යෙෂ්ඨ පොලිස් අධිකාරී ශානි අබේසේකර අත් අඩංගුවට ගැණිනි.




අනතුරුව උප පොලිස් පරීක්ෂක මෝහන මෙන්ඩිස් සහ උප පොලිස් පරීක්ෂක නවරත්න ප්‍රේමතිලක නම් නිළධාරීන් දෙදෙනාද අත්අඩංගුවට ගනු ලැබූහ.විදේශගතව සිටින හිටපු උප පොලිස් පරීක්ෂක නිශාන්ත ද සිල්වා ද මෙම නඩුවේ සැකකරුවකු ලෙස නම් කර තිබුණි.මෙන්ඩිස් අත් අඩංගුවට ගැනීමෙන් පසු කොළඹ අපරාධ කොට්ඨාශය ශානි අබේසේකරට එරෙහිව සාක්ෂි ලබා දෙන ලෙසට ඔහුට බලපෑම් කර තිබුණි.මෙම නඩුවට අදාලව ශානි අබේසේකර මාස 10 කුත් දින 18 ක්ද මෙන්ඩිස් මාස 10 කුත් දින 18ක්ද ,ප්‍රේමතිලක මාස 09 කුත් දින 19 ක්ද රිමාන්ඩ් බන්ධනාගාර ගත කරනු ලැබ සිටියහ.




මෙම නඩුව අද විභාගයට කැඳවූ අවස්ථාවේ කොළඹ අපරාධ කොට්ඨාශය වෙනුවෙන් පොලිස් පරීක්ෂක ජගත් නිශාන්ත පෙනී සිටිමින්  මෙම නඩුවේ සැකකරුවන් මුදා හැරිය හැකි බව දන්වමින් නීතිපති උපදෙස් ලැබී ඇතැයි දැනුම් දුන්නේය.කෙසේ වෙතත් එම දැනුම් දීම සම්බන්ධයෙන් නැවත සළකා බලන ලෙසට 2023 අගෝස්තු 8 වන දින කොළඹ අපරාධ කොට්ඨාශය හරහා යලි අභියාචනයක්

කළ බවත් ඊට අදාලව මෙතෙක් උපදෙස් ලැබී නොමැති බවත් පැවසීය.




එහිදී ශානි අබේසේකර වෙනුවෙන් පෙනී සිටි නීතිඥ චමින්ද අතුකෝරාළ සහ නීතිඥ හෆීල් ෆාරිස් දැනුම් දුන්නේ කොළඹ අපරාධ කොට්ඨාශය මෙම සැකකරුවන් පිරිස තවදුරටත් මෙම නඩුවට කොටු කර තැබීම සඳහා නීතිය උඩු යටි කුරු කරන බවයි.නීතිපති උපදෙස් ලැබී තිබියදී එය ක්‍රියාත්මක කිරීමට මහේස්ත්‍රාත් අධිකරණය බැඳී සිටාන බවත් ,ශානි අබේසේකර ඇතුළු පිරිස කොන්ත්‍රාත් මිනීමැරුම් කර හෝ කප්පම් ගෙන හෝ ස්ත්‍රී දූෂණ සිඳු කර නැති බවත් කොන්ත්‍රාත් ඝාතනයක් සම්බන්ධව විමර්ශනය කර නියෝජ්‍ය පොලිස්පතිවරයකු අත් අඩංගුවට ගෙන ඇති බවත් එම නඩුවට අදාලව ත්‍රිපුද්ගල මහාධිකරණයක් ඉදිරියේ පැවති නඩු විභාගයකින් පසුව එම නියෝජ්‍ය පොලිස්පතිට මරණ දඬවම නියම කරන ලද බවත්,එම සිද්ධිය විමර්ශනය කළ නිසා මෙම නිළධාරීන් අත් අඩංගුවට ගෙන ඇති බවත් නීතිඥවරැ පැවසූහ.




තවදුරටත් අධිකරණයේ ශානි අබේසේකර වෙනුවෙන් පෙනී සිටි නීතිඥ චමින්ද  අතුකෝරාළ මෙසේද පැවසීය.




"...මෙම නඩුවට අදාලව කොළඹ අපරාධ කොට්ඨාශය වාර්තා කරල තියෙන වරදවල් අධිචෝදනීය වරදවල්.මෙම අධිකරණයට බලය තියෙන්නේ ඒ සම්බන්ධයෙන් විමර්ශනයට සහාය දීම පමණයි.මෙම විමර්ශ⁣නයෙන් පසුව නඩුවට අදාල උදෘත නීතිපති වෙත යොමු කළා.නීතිපති දෙපාර්තමේන්තුව  මාස ගණනක් තිස්සේ ඒවා පරිශීලනය කර මෙම නඩුවේ 1,2,3 සහ 4 සැකකරුවන්ට එරෙහිව නඩුව තවදුරටත් පවත්වාගෙන යාමට හැකි තරමේ කරුණු නැතා බව දන්වා තියෙනවා.ඒ අනුව සරකකරුවන් එරෙහිව වැඩිදුරටත් කටයුතු නොකරන බවත් සැකකරුවන් මුදාහැරිය හැකි බවත් ප්‍රකාශ කර තියෙනවා.




ඒ වගේම ශානි අබේසේකරට ඇප ලබා දීමට අදාල ව කමණී අබේසේකර එදිරිව නීතිපති සීඒ/සීපීඒ/ 18/2022දරණ තීන්දුවේ නව වැනි පිටුවේ දෙවන ඡේදය වෙත අධිකරණයේ අවධානය යොමු කිරීමට කැමතිය.මෙය ගොතන ලද නඩුවක් බව පැහැදිලියි.මෙම තීන්දුවට

 එරෙහිව අභියාචනයක් පවා කර නැහැ.




කොළඹ අපරාධ කොට්ඨාශය කරුනු  විමර්ශනය බලලා නීතිපති උපදෙස් දී තියෙනවා විත්තිකරුවන් නිදහස් කරන්න කියලා.කොළඹ අපරාධ කොට්ඨාශය කරුණු වාර්තා කරල කියනවා නීතිපති උපදෙස් නැවත සලකා බලන්න ඉල්ලුවා කියලා .එහෙම නීතිපති උපදෙස් ලැබී තිබියදී එය ක්‍රියාත්මක නොකර ඉන්න මේ අධිකරණයට බලය තිබේද?.




අපරාධ නඩු විධාන සංග්‍රහයේ 398.2 උප වගන්තියේ මෙහෙම තියෙනවා.




(398.2 මේ වගන්තියේ විධිවාධාන යටතේ යම් නඩුවක නඩු කටයුතු වාර්තා මහේස්ත්‍රාත්වරයකු විසින් තමා වෙත එවනු ලැබූ විටක,ඒ නඩු කටයුතු වාර්තාවට අදාල පරීක්ෂණය සම්බන්ධයෙන් තමා අවශ්‍ය යැයි සළකන උපදෙස් දීමේ බලය නීතිපතිවරයාට තිබිය යුතුය.ඉන් ඉක්බිතිව මේ සංග්‍රහයේ විධිවිධාන වලට යටත්ව නීතිපතිවරයාගේ උපදෙස් ක්‍රියාත්මක කිරීමද ඒ උපදෙස්වල නියමයන්ට අනුකූලව ඒ පරීක්ෂණය පවත්වා අවසාන කිරීමද මහේස්ත්‍රාත්වරයාගේ කාර්යය විය යුතුය)   




ඒ අනුව නීතිපති උපදෙස් පිළිගැනීමට මෙම අධිකරණය බැඳී සිටිනවා.නීතිපති 

උපදෙස් දී තිබේනම් තවදුරටත් මේ අධිකරණයේ මෙම නඩුව ඉදිරියට ගෙන යාමට හැකියාවක් නෑ.නීතිපති අධිචෝදනා ගොණු කරනවා කියල තියෙද්දි ඒ ගැන සළකා බලන්න කියල නීතිපතිට අභියාචනයක් කළා.එනකමි මේක පවත්වාගෙන යන්න කියල අපට ඉල්ලන්නත් බැහැ.නීතිපති නිදහස් කරන්න කිව්වා අභියාචනයක් දැම්මා.එතකම් නිදහස් කරන් නැතුව නඩුව පවත්වා ගෙන යන්න කියල පොලීසියට ඉල්ලන්නත් බැහැ.කොළඹ අපරාධ කොට්ඨාශය පුරුදු විදියට ද්වේශ සහගතව කටයුතු කරමින්  අධිකරණ ක්‍රියාවලිය උඩු යටිකුරු කරන්න උත්සාහ කරනවා.




මෙලෙස දීර්ඝ ලෙස අධිකර⁣ණයේ කරුණු දැක්වූ නීතිඥ චමින්ද අතුකෝරාළ ඒ අනුව සැකකරුවන් නිදහස් කරන ලෙසටද ඉල්ලා සිටියේය.




නීතිඥවරුන්ගේ කරුණු දැක්වීමෙන් අනතුරුව කොළඹ අපරාධ කොට්ඨාශයේ පොලිස් පරීක්ෂක ජගත් නිශාන්ත කරුණු දක්වමින් ප්‍රකාශ කරන ලද්දේ,මෙම විමර්ශනයට අදාලව විමර්ශන #අවමන් කර ගොනුව නීතිපති වෙත යැවූ බවය.ඒ අනුව මෙම සැකකරුවන්ට එරෙහිව නිීති මගින් නීතිපති වරයා දැනුම් දුන් බවත් ඉන්පසු කොළඹ අපරාධ කොට්ඨාශය නැවත වරක් සැකකරුවන්ට එරෙහිව ඇති සාක්ෂි ගෙන හැර දක්වමින් මේ ගැන නැවත සළකා බලන ලෙසට සඳහන් කළ අභියාචනයක් පොලිස් නීති කොට්ඨාශය හරහා නීතිපති දෙපාර්තමේන්තුවට යොමු කළ බවත් පොලිස් පරීක්ෂක නිශාන්ත සඳහන් කෙරුවේය.එහෙත් මෙතෙක් ඊට අදාලව නීතිපති උපදෙස් ලැබී නැති බවද ඔහු සඳහන් කෙරුවෙිය.මෙම  නඩුවේ නීතිපති උපදෙස් එවූ පසු නැවත නීතිපතිට යොමු කළ ඉල්ලීමේදී පරණ විමර්ශනයට අදාල කලින් යොමු කළ උධෘත හැර අලුත් විමර්ශනයක උධෘත ඇතුළත් කර යැව්වේදැයි මහේස්ත්‍රාත්වරිය කොළඹ අපරාධ කො⁣ටිඨාශයෙන් විමසුවාය.එහිදී පිළිතුරු දුන් පොලිස් පරීක්ෂක ජගත් නිශාන්ත සඳහන් කෙරුවේ අලුත් විමර්ශනයක් නොකළ බවය.




මෙම සියලු කරුණු සලකා බැලූ මහේස්ත්‍රාත්වරිය තම තීන්දුව ලබා දෙමින් සඳහන් කෙරුවේ නීතිපති ලබා දී ඇති උපදෙස් අනුව සැකකරුවන් සියලු දෙනා නිදහස් කිරීමට තීන්දු කරන බවය.අපරාධ නඩු විධාන සංග්‍රහයේ කරුණු ගෙන හැර දක්වමින් දීර්ඝ ලෙස තම නියෝගය  සටහන් කළ මහේස්ත්‍රාත්වරිය ,වැඩිදුරටත් සදහන් කරන ලද්දේ නීතිපති උපදෙස් ක්‍රියාත්මක නොකිරීමට හැකි කරුණු කිසිවක් මේ නඩුවට අදාලව ඉදිරිපත් වී නැති බවය.නීතිපති සැකකරුවන් නිදහස් කිරීම ගැන එවූ ලිපිය හැර වෙනත් කිසිවක් පොලීසිය මගින් හෝ රජයේ නීතිඥවරයකු මගින් හෝ නීතිපතිවරයා යලි අධිකරණයට දැනුම් දී නැතැයිද ,සැකකරුවන් නිදහස් කිරීම මගින් පැමිණිල්ලට අගතියක් සිඳුවන්නේ නැතැයිද  මහේස්ත්‍රාත්වරිය තම නියෝගය දෙමින් සඳහන් කෙරුවාය.ඒ අනුව මෙම නඩුවෙන් ශානි අබේසේකර ඇතුළු සැකකරුවන් නිදහස් කරන ලදී.

•