ටිරාන් අලස්ට එරෙහිව නීතිඥ සංඟමය සටනට බසී

 

පාතාල සහ මත් ද්‍රව්‍ය ජාවාරම්කරුවන් දු⁣ටු පමණින් වෙඩි තබා ඝාතනය කිරීමට මහජන ආරක්ෂක අමාත්‍ය ටිරාන් අලස් දුන් අනීතික නියෝගය හෙලා දකින බවත් ,මෙරට නීති පද්ධතියක් ක්‍රියාත්මක කෙරෙන විට අපරාධකරුවන් තමන්ට කැමති ආකාරයට ඝාතනය කිරීමට ශ්‍රී ලංකාව පොලිස් රාජ්‍යයක් නොවන බව ශ්‍රී ලංකා නීතිඥ සංඟමය අවධාරණය කර සිටී.




නීතිඥ සංගමය මෙසේ ප්‍රකාශ කර ඇත්තේ පසුගිය දින පැවැති මාධ්‍ය සාකච්ඡාවකදීය.





මෙරට මහජන ආරක්ෂක අමාත්‍යවරයා ලෙස ටිරාන් අලස් මෙලෙස සිදු කළ ප්‍රකාශය ඉතා බරපතල බවත් නීතිඥ සංඟමය එම ප්‍රකාශය හෙලා දකින බවත් මෙම මාධ්‍ය සාකච්ඡාවේදී ශ්‍රී ලංකා නීතිඥ සංඟමයේ සභාපති නීතිඥ කෞෂල්‍ය නවරත්න  පවසා සිටින ලදී.




ඔහු මෙසේද පැවසීය




රට තුළ  විධායකය ව්‍යවස්ථාදායකය සහ අධිකරණය විසින් පාලනය කරන පාලන ක්‍රමයක් තිබියදී ආණ්ඩුවේ ඡ්‍යෙෂ්ඨ ඇමතිවරයකු ප්‍රසිද්ධියේ මෙවැනි ප්‍රකාශයක් කරන්නේ කෙසේද ? මේ රටේ අධිකරණ ක්‍රියාවලියක් පවත්වාගෙන යන නීති පද්ධතියක් තියෙද්දි දැක්ක ගමන් මිනිසුන් ඝාතනය කරන්න මේ රටේ තියෙන්නෙ පොලිස් රාජ්‍යයක් නොවෙයි.




ටිරාන් අලස් අමාත්‍යවරයා සිදු කළ මෙම ප්‍රකාශය සහ මත්ද්‍රව්‍ය ජාවාරම්කරුවන් වෙනුවෙන් පෙනී සිටින බවට නීතිඥ ප්‍රජාව සම්බන්ධයෙන් ඔහු කළ පදනම් විරහිත චෝදනාව පිළිබඳව ඉදිරියේදී දැඩි ක්‍රියාමාර්ග ගැනීමට නීතිඥ සංඟමය මේ වන විට සාකච්ඡා කරමින් තිබෙනවා.ඕනෑම සැකකරුවකු වෙනුවෙන් අධිකරණය ඉදිරියේ පෙනී සිටීමට අවස්ථාව ඇත්තේ වෘත්තිමය වශයෙන් නීතිඥවරුන්ට බව ගෝලීය වශයෙන් පිළිගත් සම්මතයක්.එමෙන්ම තමන්ගේ දේශපාලන විරුද්ධවාදීන් පවා මත්ද්‍රව්‍ය ජාවාරම්කරුවන් ලෙස අත් අඩංගුවට ගැනීමේ අවස්ථා නුදුරේදී උදා වන්නට පුළුවන්.




මෙහිදී අදහස් දැක්වූ ⁣නීතිඥ සංඟමයේ හිටපු සභාපති ජනපති නීතිඥ සාලිය පීරිස් පවසන ලද්දේ නීති විරෝධී ඝාතන සිඳු කිරීමට පොලිස් නිළධාරීන්ට නියෝග කිරීම හා පෙළඹවීම භයානක වන්නේ දූෂිත පොලිස් නිළධාරීන් හා දේශපාලඥයන් සිය විරුද්ධවාදීන් ඉලක්ක කර ගැනීම හා තමන්ගේ අපරාධ ක්‍රියාකාරකම් ඒ තුළින් සැඟවීමට කටයුතු කළ හැකි බවය.




අත් අඩංගුවේ පසුවූ පුද්ගලයන් ගේ මරණ වලට වග කිව යුතු පොලිස් නිළධාරීන්ට මූලික අයිතිවාසිකම් කඩ කිරීම් සඳහා වන්දි ගෙවන ලෙසට අධිකරණය බොහෝ අවස්ථා වලදී නියෝග කර තිබෙනවා.ඇතැම් අවස්ථාවලදී අත් අඩංගුවේදී මියගිය අයගේ මරණ වලට සම්බන්ධ වූ පොලිස් නිළධාරීන් ගණනාවකටම බන්ධනාගර ගත වීමටත් මරණ දණ්ඩනයත් පවා හිමිව තිබෙනවා.තම උසස් නිළධාරීන්ගේ අනීතික උපදෙස් වලට ක්‍රියා කර අමාරුවේ වැටුන පොලිස් නිළධාරීන් මට හමුවී තිබෙනවා.එහෙම අවස්ථාවලදී ඔවුන් බේරාගැනීම සඳහා දේශපාලඥයන්වත් උසස් නිළධාරීන්වත් එන්නේ නැහැ යැයිද එහිදී ජනාධිපති නීතිඥ සා⁣ලිය පීරිස් මහතා වැඩිදුරටත් පැවසීය.